actividades municipais, eventos, Novas
Excursión para maiores de 60 anos
Se tes 60 anos ou máis, xa te podes anotar para a excursión para maiores que organizamos dende o Concello de Vilsantar!
Será o 2 de xullo e os buses farán recollida de pasaxeiros polas parroquias a partir das 8 am. Este ano visitaremos o Concello de Muros e de Muxía, con visitas guiadas, e xantaremos no Concello de Cee. O menú terá un custe de 27,50 euros e pedimos por favor que se leve o importe exacto para facilitar o pago no restaurante.
A maiores, faranse paradas intermedias en lugares de interese.
Anótate ata o 25 de xuño chamando ao 981 77 82 57.
Axudas, Novas
Solidariedade con Manolo de Tamou
O martes 2 de xuño de 2026, ás 5:30 am, sucedeu unha desgraza nun fogar de Vilasantar. Un incendio en plena noite que reduciu a cinzas a casa de Manolo de Tamou e da súa filla. Por sorte, eles puideron fuxir das lapas e salvar a vida, pero a súa casa e todas as súas pertenzas foron consumidas polo lume.
Dende o Concello de Vilasantar iniciamos un protocolo de emerxencia social e veciños e veciñas están mostrando a súa solidariedade con esta familia, que ademais perderon á súa mascota no terrible incendio.
Agora mesmo só podemos apoialos co noso ánimo e axudas económicas para que poidan recuperar pouco a pouco a normalidade.
Por eso, a maiores do apoio que lle prestamos dende o Concello de Vilasantar, compartimos un número de conta para que a veciñanza que queira mostrar a súa solidariedade con esta familia poida facer unha doazón directa se o considera oportuno.
Nº de conta ABANCA: ES6220800024183040030708
Titular: Manuel Fernández López
Concepto: Donativo solidario
Cada gran de area suma nun momento tan angustioso e, pese a que Manolo cre que hai persoas que poidan precisar máis desta axuda, nós consideramos que sempre estaremos para apoiar a un veciño.
Cultura, Novas
Declaración institucional FEGAMP polo Día das Letras Galegas 2026
A Federación Galega de Municipios y Provincias (FEGAMP) conmemora e celebra o Día das Letras Galegas este 17 de maio de 2026 compartindo o recoñecemento público á Begoña Caamaño, xornalista e escritora, cunha vida e obra profundamente marcadas polo seu compromiso local, feminista e social.
A FEGAMP celebra dedicarlle o Día das Letras Galegas a unha persoa cunha clara influencia local, moi vinculada as súas dúas cidades vitais: Vigo e Santiago de Compostela.
Nada en Vigo en 1964, Begoña Caamaño comezou alí a súa traxectoria profesional como xornalista, deixando unha pegada indeleble desde os seus inicios en Radio Popular e Radio do Noroeste, ata a súa definitiva incorporación á Radio Galega en 1989.
Catro ano despois proseguiu o seu labor na Radio Galega xa dende Santiago de Compostela ata 2012, sendo unha gran defensora dos medios públicos galegos e do súa función de proporcionar á cidadanía información e contidos precisos para poder decidir con liberdade e responsabilidade. Defendeu unha información de calidade e condicións laborais xustas, sendo a presidenta do Comité Interempresas da CRTVG de 2000 a 2003.
Como escritora, Begoña Caamaño destacou polo seu innovador labor nas súas novelas, «Circe ou o pracer do azul» (2009) e «Morgana en Esmelle» (2012), que foron pioneiras na reinterpretación feminista dos mitos.
Coa súa homenaxe, Begoña Caamaño convértese na sétima muller á que se lle adica o Día das Letras Galegas, despois de Rosalía de Castro, Francisca Herrera Garrido, María Mariño, María Vitoria Moreno, Xela Arias e Luísa Villalta.
Na conmemoración do Día das Letras Galegas, a FEGAMP atende o seu obxectivo de promover a cultura e a lingua galega no marco das competencias que o ordenamento xurídico lles atribúe ás corporacións locais de Galicia.
Historicamente, o municipalismo galego tivo un protagonismo decisivo na reivindicación do galego e na defensa da súa extensión social, participando activamente, xa en democracia, na “Declaración do Hostal dos Reis Católicos”, subscrita en 1984, en Santiago de Compostela, por 184 alcaldías de todas as tendencias políticas e de todos os puntos da xeografía galega. Defendían a implantación do galego nas administracións públicas en Galicia, tanto no seu uso, como no seu coñecemento para o acceso ao emprego público.
Na actualidade, a FEGAMP, da que forman parte todos os concellos galegos e as catro deputacións provinciais, segue a defender a vixencia e a extensión do galego e potenciando a súa presencia nas novas canles derivadas do desenvolvemento das novas tecnoloxías da información e da comunicación.
Por mil primaveras máis para o galego.
Novas
Limpeza obrigatoria de franxas secundarias para previr incendios
De conformidade co establecido na Lei 3/2007, do 9 de abril, de prevención e defensa contra os incendios forestais de Galicia, e no Decreto 124/2021, do 29 de setembro, recórdase á veciñanza a obrigatoriedade de manter limpas e xestionadas as franxas secundarias de biomasa arredor das vivendas, núcleos de poboación e instalacións. Afecta aos predios situados:
- A menos de 50 metros das edificacións, vivendas illadas, instalacións industriais, equipamentos ou depósitos de combustible.
- Dentro do perímetro delimitado como “área de xestión obrigatoria de biomasa”.
As persoas propietarias deberán limpar a vexetación espontánea, cortar árbores e eliminar especies pirófitas (como eucalipto, piñeiro ou acacias) no prazo máximo establecido pola normativa, antes do 31 de maio de 2026.
A franxa de seguridade deberá manterse sen mato nin combustible fino (herbas, silvas, restos secos) e as árbores deberán respectar as distancias mínimas en relación coas vivendas e entre elas.
Execución subsidiaria e sancións
De non cumprirse esta obriga no prazo indicado, o Concello poderá ordenar a execución subsidiaria dos traballos, repercutindo o custo ás persoas propietarias, sen prexuízo das sancións que poidan impoñerse conforme á lexislación vixente.
Recoméndase a todas as persoas afectadas que revisen as súas parcelas e realicen as tarefas de limpeza o antes posible, evitando así riscos e sancións administrativas.
Novas, sostibilidade, Xestión de residuos
Recollida de plásticos agrícolas
O día 2 de marzo a empresa encargada fará a recollida dos plásticos agrícolas. Para facer uso deste servizo é imprescindible anotarse ata o 26 de febreiro, chamando ao 981 778 169.
Os plásticos deberán estar debidamente atados en fardos. Estes plásticos almacenados e preparados para a súa recollida deberán ter a menor suciedade posible, procedente de terra, herba ou materia orgánica, e evitar conter outras materias impropias (tubaxes de pvc, garrafas, sacos big-bag, rodas…) que poden dificultar os traballos de reciclaxe e tratamento final de recuperación para novos usos. De non ser así, poderá ser rexeitada a recollida.
Os fardos deben de estar a disposición nun punto de fácil acceso para o camión de recollida.
actividades municipais, Novas
Entroido 2026: concurso de disfraces
O concurso de disfraces do Entroido 2026 no Concello de Vilasantar terá lugar o sábado 14 de febreiro, a partir das 17:00 horas, no pavillón polideportivo de Présaras.
Para participar é obrigatorio anotarse previamente chamando ao 981 778 169 ou o mesmo día do concurso, no horario comprendido entre as 16:00 horas e as 16:30 horas.
Establécense dúas categorías: comparsa ou grupo e individual ou dúo. Na primeira categoría, dun conxunto mínimo de tres persoas, os premios serán: 1º 200 euros, 2º 100 euros, 3º 50 euros. No tocante á segunda categoría os premios serán: 1º 100 euros, 2º 50 euros, 3º 25 euros.
O xurado terá en conta o vestiario, a maquillaxe e a estética, a orixinalidade, a creatividade, o traballo na elaboración dos disfraces, a organización e a posta en escena, participación e interacción co público, a simpatía e a animación. A valoración farase cunha puntuación de 0 a 5 puntos, sendo 0 a de menor valor e o 5 a de maior valor.
Establécese un tempo máximo de realización da posta en escena e espectáculo, que será de 4 minutos, transcorridos os cales a música e posta en escena será parada. O xurado terá potestade para resolver calquera dúbida que poida xurdir no desenvolvemento do concurso. Aqueles disfraces que pola súa temática resultan ofensivos, discriminatorios ou vexatorios, poderán ser excluídos da participación no desfile.
A decisión do xurado será inapelable e terá competencia para resolver calquera circunstancia non prevista nas presentes bases. O xurado estará formado por tres membros non participantes no concurso, designados polo Concello, mediante Resolución da alcaldía.
Os participantes que precisen de música para a actuación ou representación do espectáculo deberana traer nun USB, e avisar no concello no momento de anotarse. A USB deberá vir claramente identificada, poñendo o propietario e o lema co que participa no concurso e só deberá conter o tema que van interpretar. Utilizarase un USB por cada participante que precise interpretar un tema. No caso de xurdir algún problema coa reprodución do arquivo, a música que se empregará será a que propoña a organización.
A entrega de premios terá lugar o mesmo día de celebración do concurso, unha vez feita a avaliación polo xurado, de maneira simbólica, xa que a efectividade do premio farase por transferencia bancaria.
Os premios poderán quedar desertos no caso de que non haxa participantes.
Para cobrar o premio os gañadores deberán designar un representante (nome, apelidos, DNI) e facilitar no concello un número de conta (con IBAN) a seu nome para facer efectivo o ingreso, xunto cunha fotocopia do DNI.
Este evento será gravado e fotografiado, e as fotos e imaxes poden ser publicadas nas redes sociais do Concello de Vilasantar e na súa páxina web. Os datos conservaranse mentres sexa necesario para cumprir coa finalidade prevista e durante os prazos de prescrición legais. Os interesados poderán exercer os seus dereitos de acceso, rectificación, supresión, oposición, revogación do consentimento e limitación ante o Concello de Vilasantar.