Axudas
Axudas a investimentos produtivos en explotacións agrarias
Convocatoria:
Axudas a investimentos produtivos en explotacións agrarias vinculadas a contribuír á mitigación adaptación ao cambio climático e uso eficiente dos recursos naturais. Explotacións agrarias.
Obxectivos:
Axudas destinadas a acelerar a modernización dos equipamentos e o uso de tecnoloxías que permitan unha utilización máis eficiente dos recursos naturais nos procesos produtivos e a incorporación de equipamento máis eficiente enerxeticamente.
Entidades beneficiarias:
Titulares/cotitulares de explotación agraria inscrita no Rexistro de Explotacións Agrarias de Galicia ou ben ser persoa agricultora moza que se establece cun plan empresarial que inclúe actuacións en materia de mitigación-adaptación ao cambio climático e ao ambiente.
Gastos subvencionables:
a) Máquinas relacionadas coa xestión eficiente de estercos e xurros. A maquinaria de aplicación de xurro mediante sistemas de prato, abano ou canóns non se considera elixible.
b) Máquinas que melloren a aplicación eficiente de fertilizantes.
c) Máquinas que melloren a aplicación eficiente de produtos fitosanitarios.
d) Maquinaria agrícola que optimice a xestión de recursos:
a. Carro mesturador con análise NIR da ración.
b. Tractor con clasificación enerxética A.
c. Robot.
e) Compoñente de agricultura de precisión para a adaptación de equipamentos na explotación:
a. Kit de adaptación ISOBUS.
b. Sensor NIR.
c. Sistema de adaptación de máquinas para traballo variable.
d. Sistema de autoguiado.
f) Estudos técnico-económicos de viabilidade.
Contía da subvención:
- O importe da axuda será do 40 % dos custos elixibles, que poderá incrementarse ata un máximo do 75% en función da aplicación dos seguintes criterios:
a) 10 % cando os investimentos sexan realizados por unha persoa que cumpra as condicións de persoa agricultora moza.
b) 10 % no caso de investimentos en zonas con limitacións naturais de montaña ou en Rede Natura 2000.
c) 10 % no caso de investimentos en explotación de agricultura ecolóxica.
d) 5 % no caso de que a persoa titular da explotación sexa muller.
No caso de investimentos en explotación intensiva, a axuda limitarase á porcentaxe de axuda base. - O investimento mínimo elixible establécese en 12.500 euros.
- A contía máxima da axuda establécese en 100.000 euros.
Prazos:
Prazo de presentación de solicitude: 22/05/2026 – 22/06/2026
Documentación e bases:
Bases reguladoras
BDNS
Sede electrónica
Cultura, Novas
Declaración institucional FEGAMP polo Día das Letras Galegas 2026
A Federación Galega de Municipios y Provincias (FEGAMP) conmemora e celebra o Día das Letras Galegas este 17 de maio de 2026 compartindo o recoñecemento público á Begoña Caamaño, xornalista e escritora, cunha vida e obra profundamente marcadas polo seu compromiso local, feminista e social.
A FEGAMP celebra dedicarlle o Día das Letras Galegas a unha persoa cunha clara influencia local, moi vinculada as súas dúas cidades vitais: Vigo e Santiago de Compostela.
Nada en Vigo en 1964, Begoña Caamaño comezou alí a súa traxectoria profesional como xornalista, deixando unha pegada indeleble desde os seus inicios en Radio Popular e Radio do Noroeste, ata a súa definitiva incorporación á Radio Galega en 1989.
Catro ano despois proseguiu o seu labor na Radio Galega xa dende Santiago de Compostela ata 2012, sendo unha gran defensora dos medios públicos galegos e do súa función de proporcionar á cidadanía información e contidos precisos para poder decidir con liberdade e responsabilidade. Defendeu unha información de calidade e condicións laborais xustas, sendo a presidenta do Comité Interempresas da CRTVG de 2000 a 2003.
Como escritora, Begoña Caamaño destacou polo seu innovador labor nas súas novelas, «Circe ou o pracer do azul» (2009) e «Morgana en Esmelle» (2012), que foron pioneiras na reinterpretación feminista dos mitos.
Coa súa homenaxe, Begoña Caamaño convértese na sétima muller á que se lle adica o Día das Letras Galegas, despois de Rosalía de Castro, Francisca Herrera Garrido, María Mariño, María Vitoria Moreno, Xela Arias e Luísa Villalta.
Na conmemoración do Día das Letras Galegas, a FEGAMP atende o seu obxectivo de promover a cultura e a lingua galega no marco das competencias que o ordenamento xurídico lles atribúe ás corporacións locais de Galicia.
Historicamente, o municipalismo galego tivo un protagonismo decisivo na reivindicación do galego e na defensa da súa extensión social, participando activamente, xa en democracia, na “Declaración do Hostal dos Reis Católicos”, subscrita en 1984, en Santiago de Compostela, por 184 alcaldías de todas as tendencias políticas e de todos os puntos da xeografía galega. Defendían a implantación do galego nas administracións públicas en Galicia, tanto no seu uso, como no seu coñecemento para o acceso ao emprego público.
Na actualidade, a FEGAMP, da que forman parte todos os concellos galegos e as catro deputacións provinciais, segue a defender a vixencia e a extensión do galego e potenciando a súa presencia nas novas canles derivadas do desenvolvemento das novas tecnoloxías da información e da comunicación.
Por mil primaveras máis para o galego.
Axudas
Subvencións para «Rehabilitación de vivendas destinadas a vivenda habitual de persoas traballadoras con contrato de traballo con empresas que dispoñan de centros de traballo en Galicia
Convocatoria de subvencións para «Rehabilitación de vivendas destinadas a vivenda habitual de persoas traballadoras con contrato de traballo con empresas que dispoñan de centros de traballo na Comunidade Autónoma de Galicia”, para as anualidades 2026 e 2027. (TR358E e TR358F)
Persoas beneficiarias
1. Poderán solicitar as subvencións previstas para a liña con código de procedemento TR358E:
a) As empresas con centros de traballo na Comunidade Autónoma de Galicia que dispoñan de vivendas, das cales sexan propietarias, usufrutuarias ou cesionarias do seu uso por un prazo mínimo de 10 anos, e que vaian ser destinadas a vivenda habitual de persoas traballadoras coas que teñan subscrito ou subscriban contrato de traballo.
b) Persoas físicas ou xurídicas que dispoñan de vivendas, das cales sexan propietarias, usufrutuarias ou cesionarias do seu uso por un prazo mínimo de 10 anos e que teñan subscrito con algunha das empresas referidas na letra a) o oportuno instrumento xurídico onde acorden destinar a vivenda a rehabilitar a vivenda habitual de persoas que teñan subscrito ou subscriban contrato de traballo con esa empresa.
2. Poderán solicitar as subvencións previstas para a liña con código de procedemento TR358F os concellos que dispoñan de vivendas, das cales sexan propietarias, usufrutuarias ou cesionarias do seu uso por un prazo mínimo de 10 anos e que teñan subscrito con algunha das empresas referidas na letra a) do punto 1 deste artigo o oportuno instrumento xurídico onde acorden destinar a vivenda a rehabilitar a vivenda habitual de persoas que teñan subscrito ou subscriban contrato de traballo con esa empresa.
As axudas estarán destinadas á rehabilitación de vivendas das que sexan propietarias, usufrutuarias ou cesionarias do seu uso por un prazo mínimo de 10 anos, a:
a) empresas que dispoñan de centros de traballo na Comunidade Autónoma de Galicia que destinen esa vivenda a vivenda habitual de persoas traballadoras coas que teñan subscrito ou subscriban contrato de traballo.
b) persoas físicas ou xurídicas que teñan subscrito con algunha das empresas referidas na letra a) o oportuno instrumento xurídico onde acorden destinar a vivenda a rehabilitar a vivenda habitual de persoas traballadoras que teñan subscrito ou subscriban contrato de traballo con esa empresa.
As axudas previstas nas letras a) e b) tramitaranse co código de procedemento TR358E.
c) concellos que teñan subscrito con algunha das empresas referidas na letra a) o oportuno instrumento xurídico onde acorden destinar a vivenda a rehabilitar a vivenda habitual de persoas traballadoras que teñan subscrito ou subscriban contrato de traballo con esa empresa.
As axudas previstas na letra c) tramitaranse co código de procedemento TR358F.
Para cada solicitude indicarase o código de procedemento que corresponda, non se poderá presentar unha mesma solicitude de subvención para as dúas liñas de axuda.
Prazo de presentación de solicitudes dende 16/05/2026 ata 15/07/2026)
Contía das axudas
As axudas reguladas nesta orde poderán ser destinadas á rehabilitación tanto de vivendas unifamiliares coma de edificios residenciais colectivos inacabados ou que se encontren en situación de esqueleto inmobiliario.
Para o caso de que a vivenda que será obxecto da rehabilitación subvencionable sexa unha vivenda unifamiliar, a contía das axudas poderá alcanzar ata o 95 % do orzamento protexido das obras, sen que en ningún caso poidan superar a cantidade de 50.000 euros por vivenda rehabilitada, agás no caso de que o solicitante da axuda sexa un concello, caso en que a contía poderá alcanzar ata o 95% do orzamento protexido das obras, sen que en ningún caso poidan superar a cantidade de 75.000 euros por vivenda rehabilitada.
Para caso de edificios residenciais colectivos inacabados ou que se encontren en situación de esqueleto inmobiliario, a contía das axudas poderá alcanzar ata o 95 % do orzamento protexido das obras, sen que en ningún caso poidan superar a cantidade de 30.000 euros por cada unha das vivendas que formen parte do inmoble, nin a cantidade conxunta para todo o inmoble poida superar os 300.000 euros.
O límite máximo por vivenda rehabilitada incrementarase en 1.000 € no caso de que a vivenda unifamiliar ou o edificio residencial colectivo que se vai rehabilitar estean situados nun área Rexurbe creadas conforme a Lei 1/2019, do 22 abril, de rehabilitación e de rexeneración e renovación urbanas de Galicia.
O orzamento de execución das obras poderá incluír, conforme o establecido no artigo 3.2 desta orde, as seguintes actuacións preparatorias: os honorarios dos profesionais que interveñan; os informes técnicos e certificados necesarios; os gastos derivados da tramitación administrativa e outros gastos xerais similares, sempre que todos eles estean debidamente xustificados.
As persoas interesadas poderán solicitar, a maiores da axuda para a rehabilitación da vivenda, a contratación do seguro de impago do alugamento ou cesión de uso sobre a vivenda obxecto da actuación, non podendo superar en ningún caso o importe máximo anual de 600 euros, polo tempo de duración do contrato de alugamento ou cesión de uso da vivenda, ata un máximo de 5 anos.
Réxime de concesión
1. O procedemento de concesión de subvencións tramitaráse e resolverase en réxime de concorrencia competitiva, de acordo co disposto no artigo 19.1 da Lei 9/2007, do 13 de xuño, de subvencións de Galicia, polo que a concesión das subvencións se realiza a través da comparación das solicitudes presentadas, co fin de establecer unha prelación entre estas de acordo cos criterios de valoración fixados nesta orde e adxudicar, co límite tamén fixado nesta orde dentro do crédito dispoñible, aquelas que obtivesen maior valoración en aplicación dos citados criterios.
2. Non se poderán outorgar subvencións por contía superior á que se determine na presente convocatoria, salvo no caso de ampliación da contía máxima dos créditos dispoñibles para ela segundo o disposto no artigo 5.2 desta orde.
3. Poderá concederse un máximo de tres axudas por persoa solicitante para o caso de vivendas unifamiliares, e un máximo de dez axudas se se trata de vivendas que formen parte dun edificio residencial colectivo inacabado ou que se encontre en situación de esqueleto inmobiliario.
A persoa solicitante deberá presentar unha solicitude para cada unha das vivendas para as que se solicita a axuda.
actividades municipais
Festa de maiores 2026 en Vilasantar
Se tes máis de 60 anos, xa te podes anotar para participar na festa dos maiores! Será o 19 de xuño, comezando cunha misa solemne na igrexa de Présaras ás 13:00 h, para a continuación desprazarnos ao xardín botánico se fai sol ou pavillón de Présaras se chove, onde comezará o xantar ás 14:00 h.
O menú consitirá en empanada de bonito, polbo á feira, xarrete de tenreira galega con patacas e verduras de guarnición, pastel de queixo e tarta de améndoas, café con gotas e augardente do Ulla, viño tinto e branco DO, refrescos e auga. A xornada estará amenizada por un dúo musical.
As persoas empadroadas en Vilasantar maiores de 60 anos poderán acudir de xeito gratuíto, mentres que as non empadroadas con vivenda en Vilasantar terán que aboar 20 euros e as que non teñan casa, 30 euros.
Os pagos deberán efectuarse na conta de Abanca ES16 2080 0024 1931 1000 0012, especificando no concepto “Festa dos maiores 2026”, indicando nome, apelidos e DNI. Deberase entregar o xustificante de pago no momento de anotarse.
O día límite para confirmar a asistencia é o 15 de xuño e pódese facer chamando ao 981 778 169 ou 981 77 82 57.
Novas
Limpeza obrigatoria de franxas secundarias para previr incendios
De conformidade co establecido na Lei 3/2007, do 9 de abril, de prevención e defensa contra os incendios forestais de Galicia, e no Decreto 124/2021, do 29 de setembro, recórdase á veciñanza a obrigatoriedade de manter limpas e xestionadas as franxas secundarias de biomasa arredor das vivendas, núcleos de poboación e instalacións. Afecta aos predios situados:
- A menos de 50 metros das edificacións, vivendas illadas, instalacións industriais, equipamentos ou depósitos de combustible.
- Dentro do perímetro delimitado como “área de xestión obrigatoria de biomasa”.
As persoas propietarias deberán limpar a vexetación espontánea, cortar árbores e eliminar especies pirófitas (como eucalipto, piñeiro ou acacias) no prazo máximo establecido pola normativa, antes do 31 de maio de 2026.
A franxa de seguridade deberá manterse sen mato nin combustible fino (herbas, silvas, restos secos) e as árbores deberán respectar as distancias mínimas en relación coas vivendas e entre elas.
Execución subsidiaria e sancións
De non cumprirse esta obriga no prazo indicado, o Concello poderá ordenar a execución subsidiaria dos traballos, repercutindo o custo ás persoas propietarias, sen prexuízo das sancións que poidan impoñerse conforme á lexislación vixente.
Recoméndase a todas as persoas afectadas que revisen as súas parcelas e realicen as tarefas de limpeza o antes posible, evitando así riscos e sancións administrativas.
Ofertas de Emprego
Convocatoria de dúas prazas fixas de Auxiliar do Servizo de Axuda no Fogar polo sistema de oposición en quenda libre
Resolución de 13 de marzo de 2026, do Concello de Vilasantar, referente á convocatoria para prover varias prazas. No «Boletín Oficial da Provincia de A Coruña» número 45, do 9 de marzo de 2026, publicáronse as bases que rexirán a convocatoria para prover:
– Dúas prazas de Auxiliar do Servizo de Axuda no Fogar do plantel de persoal laboral fixo, polo sistema de oposición, en quenda libre.
O prazo de presentación de solicitudes será de vinte días hábiles a contar dende o seguinte ao da publicación desta resolución no «Boletín Oficial do Estado».
Os sucesivos anuncios referentes a esta convocatoria, cando procedan de conformidade coas bases, faranse públicos na forma prevista nas propias bases.
Axudas
AXUDAS DA XUNTA DE GALICIA A ASOCIACIÓNS VECIÑAIS, CONFEDERACIÓNS, FEDERACIÓNS OU UNIÓNS DE ASOCIACIÓNS DE VECIÑOS, COMUNIDADES DE USUARIOS DE AUGAS E ASOCIACIÓNS DE MULLERES RURAIS DE GALICIA (PR487A), PARA O ANO 2026
OBXECTO: os gastos ocasionados como consecuencia de investimentos realizados en inmobles de titularidade veciñal ou sobre os cales a entidade solicitante ten un dereito de uso por convenio ou por calquera outro título, así como equipamentos necesarios para o seu funcionamento, todos eles orientados ao cumprimento dos fins da entidade, e as obras nas traídas de auga comunitarias.
BENEFICIARIOS: as asociacións de veciños, confederacións, federacións ou unións de asociacións de veciños de Galicia, comunidades de usuarios de augas debidamente inscritas no rexistro público correspondente e asociacións de mulleres rurais de Galicia.
Prazo de solicitude ata o 20 de abril de 2026.
REQUISITOS:
1. As entidades deberán estar, en todo caso, debidamente inscritas no correspondente Rexistro de Asociacións da Comunidade Autónoma de Galicia (central ou provincial), dependentes da Vicepresidencia Primeira e Consellería de Presidencia, Xustiza e Deportes, e conter na súa denominación a identificación como asociación de veciños, federación, confederación ou unión de asociacións de veciños ou como asociación de mulleres rurais, segundo o caso.
2. As comunidades de usuarios de augas deberán estar legalmente constituídas e inscritas no libro do Rexistro de Augas do correspondente organismo de bacía como titulares do aproveitamento de augas para o cal solicitan subvención.
3. Non se admitirán as solicitudes das entidades non inscritas na data en que remate o prazo de solicitudes.
CUANTÍA: A axuda económica que se conceda poderá abranguer a totalidade do investimento realizado cun límite máximo por entidade de 12.000 euros para a realización de obras (liña 1. obras) e de 5.000 euros para a dotación de equipamentos (liña 2. equipamentos).
Considéranse subvencionables os seguintes proxectos:
a. Liña 1: as obras de acondicionamento, reforma e ampliación dos locais en que a entidade veciñal ou de mulleres rurais desenvolve a súa actividade e as obras de mellora, reforma e reparación das infraestruturas e instalacións das traídas de auga comunitarias, promovidas por comunidades de usuarios de augas.
b. Liña 2: a adquisición de equipamentos básicos dos locais, necesarios para o funcionamento ordinario da entidade, integrado por mobiliario, equipamentos de oficina, equipamento informático ou equipamento acústico e audiovisual; e a adquisición doutro equipamento ou mobiliario para actividades específicas, que non terá carácter básico.
Publicación: Diario Oficial de Galicia do día 18-03-2026, nº 52
actividades municipais, igualdade
Visita do CIM móbil ao Concello de Vilasantar.
- 24 de abril de 2026
- Diante da Casa do Concello
- De 10 a 13 h
O Centro de Información ás Mulleres móbil é un recurso especializado na atención integral a mulleres vítimas de violencia de xénero e outros colectivos vulnerables, asegurando un acceso ao servizo universal e sen barreiras e garantindo a igualdade de atención independentemente das circunstancias persoais ou sociais.
Os obxectivos deste servizo son:
- Levar atención psicolóxica, social e xurídica especializada aos territorios sen CIM.
- Informar, asesorar e acompañar de forma integral ás vítimas de violencia de xénero e sexual.
- Desenvolver accións de prevención e sensibilización comunitaria en diferentes espazos.
- Promover a igualdade de xénero e a diversidade LGBTI con campañas adaptadas a distintos públicos.
- Reforzar a coordinación entre recursos locais, autonómicos e universitarios.
O CIM móbil é un recurso aberto a toda a cidadanía, que permite a calquera persoa achegarse, informarse e coñecer os servizos dispoñibles.
Axudas, Cultura
REDE CULTURAL 2026
Beneficiarios: Concellos e entidades sen ánimo de lucro (polo programa Alicerce) xuridicamente constituídas que teñan entre as súas finalidades a promoción da cultura.
Prazo aberto ata o 20 de marzo de 2026 ás 14:00 h. Tramitación telemática.
Poden solicitarse actuacións de música, teatro, bandas de gaitas, charangas, magos, danza, etc. Data de realización dos espectáculos todo o 2026 e ata o 31 de marzo de 2027.
As entidades sen ánimo de lucro poden solicitar as actuacións subvencionables pola Deputación da Coruña entre un 30% e 70%, polo programa Alicerce. Só unha actuación por entidade.
Consulta os espectáculos: www.dacoruna.gal/cultura/rede-cultural/
Para solicitar os espectáculos emprega o vínculo SUBTEL: https://sede.dacoruna.gal/subtel/solicitudes
Consulta as bases no BOP do día 19-12-2025.
actividades municipais
Campamento de Semana Santa en Vilasantar
Para nenos e nenas de 3 a 12 anos. Terá lugar no CEIP de Présaras, do 30 de marzo ao 6 de abril, en horario de 10 a 14 h.
As follas de inscrición entregaranse nas dependencias municipais, por Sede Electrónica ou no colexio de Présaras. As prazas asignaranse por estrito orde de inscrición, dando prioridade os nenos e nenas
empadroados no Concello de Vilasantar. Os non empadroados poderán participar cando queden prazas libres.
As faltas de asistencia non xustificadas, no caso de existir lista de agarda, poderán ser causa de baixa no servizo.
Máis información no : 981 77 81 69
RECOMENDACIÓNS: levar auga e un aperitivo saudable para tomar a media mañá.
Actividade financiada pola Consellería de Política Social e Igualdade e o Ministerio de Igualdade.